ഇന്ത്യൻ വാദ്യോപകരണങ്ങൾ
■ തന്ത്രി വാദ്യങ്ങൾ
തന്ത്രികൾ ഉപയോഗിച്ച് നാദം ഉണ്ടാക്കുന്ന വാദ്യങ്ങളാണ് തന്ത്രി വാദ്യങ്ങൾ അഥവാ തതവാദ്യങ്ങൾ. ഇവ തന്ത്രികളുടെ കമ്പനം ഉപയോഗിച്ച് പ്രവർത്തിക്കുന്ന വാദ്യങ്ങളാണ്. വീണ, തംബുരു എന്നിവ തന്ത്രി വാദ്യങ്ങൾക്ക് ഉദാഹരണങ്ങളാണ്. കർണാടക സംഗീതം, ഹിന്ദുസ്ഥാനി സംഗീതം, നാടോടി സംഗീതം എന്നിവയിലെല്ലാം തന്ത്രിവാദ്യങ്ങൾ ഉപയോഗിക്കപ്പെടുന്നു.
1. നാടോടി തന്ത്രി വാദ്യങ്ങൾ - വില്ലടിവാദ്യം, തുംതുണെ, ഏക്താര, തംബൂര, ബുവാംഗ്
2. ഹിന്ദുസ്ഥാനി തന്ത്രി വാദ്യങ്ങൾ - സിത്താർ, സരോദ്, സന്തൂർ, സാരംഗി, സ്വർമണ്ഡൽ
3. കർണാടക തന്ത്രി വാദ്യങ്ങൾ - തംബുരു, വീണ, ഗോട്ടുവാദ്യം, വയലിൻ
4. പാശ്ചാത്യ തന്ത്രി വാദ്യങ്ങൾ - ഗിറ്റാർ, വയലിൻ, മാൻഡൊലിൻ, പിയാനോ
■ അവനദ്ധ വാദ്യങ്ങൾ
'അവനദ്ധം' എന്ന സംസ്കൃതവാക്കിന്റെ അർത്ഥം മൂടപ്പെട്ടത്, പൊതിയപ്പെട്ടത് എന്നെല്ലാമാണ്. പൊള്ളയായ വസ്തുവിന്റെ തുറന്ന ഭാഗത്ത് തുകൽ മുറുക്കി ബന്ധിച്ചാണ് അവനദ്ധ വാദ്യങ്ങൾ ഉണ്ടാക്കുന്നത്. അതിനാൽ അവയെ തുകൽ വാദ്യങ്ങൾ അല്ലെങ്കിൽ ചർമ്മ വാദ്യങ്ങൾ എന്നും വിളിക്കുന്നു. അവനദ്ധവാദ്യങ്ങൾ താള വാദ്യങ്ങൾ എന്നുമറയിപ്പെടുന്നു. ചെണ്ട, മദ്ദളം, ഇടയ്ക്ക, മൃദംഗം, തകിൽ, തിമില, മിഴാവ്, ഉടുക്ക്, തുടി, കടുന്തുടി, ഗഞ്ചിറ, ദഫ്, തബല, ഡോലക്, പഖവാജ്, തപ്പ് എന്നിവ അവനദ്ധ വാദ്യങ്ങൾക്ക് ഉദാഹരണങ്ങളാണ്.
■ സുഷിര വാദ്യങ്ങൾ
സുഷിരങ്ങളിലൂടെ വായു കടന്നുപോകുമ്പോൾ നാദമുണ്ടാക്കുന്ന ഉപകരണങ്ങളാണ് സുഷിര വാദ്യങ്ങൾ. ഇവ ഉച്ഛ്വാസ വായു ഉപയോഗിച്ച് വായിക്കുന്നു. സുഷിര വാദ്യങ്ങൾക്ക് കുഴൽ വാദ്യങ്ങൾ എന്നും പേരുണ്ട്. ശംഖ്, കൊമ്പ്, കുഴൽ, ഓടക്കുഴൽ, നാദസ്വരം എന്നിവ സുഷിര വാദ്യങ്ങൾക്ക് ഉദാഹരണങ്ങളാണ്.
■ ഘന വാദ്യങ്ങൾ
മണ്ണ്, തടി, ലോഹങ്ങൾ തുടങ്ങിയവകൊണ്ടാണ് ഘനവാദ്യങ്ങൾ നിർമ്മിക്കുന്നത്. മിക്ക ഘനവാദ്യങ്ങളും താളം പകരുവാനാണ് ഏറെയും ഉപയോഗിക്കുന്നത്. കർണാടക സംഗീതത്തിൽ ഇവയെ ഉപതാളവാദ്യങ്ങളായാണ് കണക്കാക്കുന്നത്. ചേങ്ങില, ഇലത്താളം, കോൽ, ഓണവില്ല് തുടങ്ങിയ കേരളത്തിലെ ഘന വാദ്യങ്ങളാണ്. ഡഹര, ജലതരംഗം, മഞ്ജീര, ചുടിയാൻ, ശ്രീ മണ്ഡൽ, ചിംത എന്നിവ ഇന്ത്യയിലെ വിവിധ പ്രദേശങ്ങളിൽ ഉപയോഗിച്ചു വരുന്ന ഘനവാദ്യങ്ങളാണ്.
