മൂന്നാം വട്ടമേശ സമ്മേളനം (Third Round Table Conference)
1932 നവംബർ 17 ന് ലണ്ടനിൽ ആരംഭിച്ച മൂന്നാം വട്ടമേശ സമ്മേളനത്തിൽ ഗവണ്മെന്റിനോടു കൂറുപുലര്ത്തിയിരുന്ന 46 പ്രതിനിധികൾ മാത്രമാണ് പങ്കെടുത്തത്. മുഹമ്മദ് അലിയും, ജിന്നയും, ആഗാഖാനും ബി.ആർ.അംബേദ്കറും പങ്കെടുത്തു. കോൺഗ്രസ് പ്രതിനിധികൾ ഈ സമ്മേളനത്തിൽ പങ്കെടുത്തില്ല. ഭാവിയിലെ ഇന്ത്യൻ ഭരണഘടനയെ സംബന്ധിച്ചുള്ള ചില സാമാന്യ തത്വങ്ങൾ ഈ സമ്മേളനം രൂപപ്പെടുത്തി. മൂന്നാം വട്ടമേശ സമ്മേളനത്തിന്റെ അന്ത്യത്തില് പുറപ്പെടുവിച്ച ധവളപത്രത്തിന്റെ അടിസ്ഥാനത്തിലാണ് 1935 ലെ ഇന്ത്യാ ഗവൺമെന്റ് നിയമം പാസ്സാക്കിയത്. 1935 ലെ ഇന്ത്യാ നിയമം ഇന്ത്യയിൽ പ്രാതിനിധ്യ ഗവൺമെന്റിന് തുടക്കം കുറിച്ചു.
ഈ സമ്മേളനത്തിൽ കേംബ്രിഡ്ജിലെ ഒരു മുസ്ലിം വിദ്യാർത്ഥിയായിരുന്ന റഹ്മത് അലിയുടെ ആശയമായ ഇന്ത്യയുടെ വടക്കുപടിഞ്ഞാറ് ഭാഗത്ത് ഒരു 'മുസ്ലിം സ്റ്റേറ്റ്' സ്ഥാപിക്കണമെന്ന് മുസ്ലിം പ്രതിനിധികൾ ആവശ്യപ്പെടുകയുണ്ടായി. റഹ്മത് അലി ഈ രാഷ്ട്രത്തിന് പാക്സ്ഥാൻ (Pakstan) എന്ന പേരും നിർദേശിച്ചിരുന്നു. പഞ്ചാബ്, അഫ്ഗാനിയ, കാശ്മീർ, സിന്ധ്, എന്നീ സ്ഥലപ്പേരുകളുടെ ആദ്യാക്ഷരങ്ങളും, ബലൂചിസ്ഥാന്റെ അവസാന മൂന്നു അക്ഷരങ്ങളും ചേർത്താണ് അദ്ദേഹം ഈ പേരുണ്ടാക്കിയത്. ഉറുദു ഭാഷയിൽ 'പുണ്യഭൂമി' എന്നാണ് ഈ പദത്തിന്റെ അർത്ഥം. പാക്സ്ഥാൻ പിന്നീട് പാക്കിസ്ഥാൻ ആയി രൂപാന്തരപ്പെടുകയുണ്ടായി.
മൂന്ന് വട്ടമേശ സമ്മേളനത്തിലും പങ്കെടുത്ത ഇന്ത്യക്കാരൻ ബി.ആർ.അംബേദ്കറാണ്. ഡിപ്രസ്ഡ് ക്ലാസ്സിന്റെ പ്രതിനിധിയായാണ് അദ്ദേഹം പങ്കെടുത്തത്.
ആവർത്തിക്കുന്ന ചോദ്യങ്ങൾ
1. മൂന്നാം വട്ടമേശ സമ്മേളനം നടന്ന വർഷം - 1932
2. മൂന്ന് വട്ടമേശ സമ്മേളനങ്ങളിലും പങ്കെടുത്ത വ്യക്തി ആര് - ബി.ആർ.അംബേദ്കർ
3. മൂന്നു വട്ടമേശ സമ്മേളനത്തിലും പങ്കെടുത്ത മുസ്ലിം വനിത ആരാണ് - ബീഗം ജഹനഹാര ഷഹനവാസ്
4. രണ്ടും മൂന്നും വട്ടമേശ സമ്മേളന സമയത്ത് ഇന്ത്യന് വൈസ്രോയി ആരായിരുന്നു - വെല്ലിംഗ്ടൺ പ്രഭു
5. മൂന്നാം വട്ടമേശ സമ്മേളനത്തിൽ പങ്കെടുത്ത പ്രതിനിധികൾ എത്ര - 46
6. 1935 ലെ ഗവൺമെന്റ് ഓഫ് ഇന്ത്യ നിയമത്തിന് കാരണമായി തീർന്ന വട്ടമേശ സമ്മേളനം - മൂന്നാം വട്ടമേശ സമ്മേളനം