ചിഹ്നം (വ്യാകരണം)
വ്യക്തമായ ആശയപ്രകാശനത്തിനും അര്‍ഥഗ്രഹണത്തിനും വാക്യങ്ങളില്‍ ചിഹ്നനം ആവശ്യമാണ്‌. ഭാഷയില്‍ പ്രയോഗത്തിലുള്ള പ്രധാന ചിഹ്നങ്ങളും അവ ചേര്‍ക്കേണ്ട സന്ദര്‍ഭങ്ങളും.
1. പൂര്‍ണവിരാമം (ബിന്ദു) full stop (.)
* വാക്യത്തിന്റെ അവസാനം.
* ചുരുക്കെഴുത്തിന്‌ ഇടയില്‍.
* ഔപചാരിക ചോദ്യത്തിന്റെ അവസാനം.
ഉദാ:-
1) ഇന്ത്യ എന്റെ രാജ്യമാണ്‌.
2) യു.എന്‍.ഒ.
3) ഈ പുസ്തകമൊന്ന്‌ കൊടുക്കാമോ.
2. അല്പവിരാമം (അങ്കുശം) comma (,)
* അംഗവാകൃയത്തിന്റെ അവസാനം.
* ഘടകപദങ്ങൾക്ക്‌ ശേഷം.
* ഒരേജാതി പദങ്ങളെ വേര്‍തിരിച്ചെഴുതുമ്പോൾ.
* സമപ്രാധാന്യമുള്ള പദസമൂഹത്തിന്‌ ഇടയില്‍.
* സംബോധനനയ്ക്ക്‌ ശേഷം.
ഉദാ:-
1) നിങ്ങൾ അവിടെ എത്തിയാല്‍, ആ വിവരം എന്നെ അറിയിക്കണം.
2) വീണപൂവ്‌, കരുണ, ദുരവസ്ഥ എന്നിവ കുമാരനാശാന്റെ ഖണ്ഡകാവ്യങ്ങളാണ്‌.
3) സുഹൃത്തേ, സുഖമാണല്ലോ.
4) ഭാരതത്തിന്റെ ആത്മസത്തയുടെ ആവിഷ്കാരമായിരുന്നു, സന്ന്യാസത്തിന്‌ പുതിയ വ്യാഖ്യാനം നൽകിയ സ്വാമി വിവേകാനന്ദന്‍.
3. അര്‍ധവിരാമം (രോധിനി) Semicolon (;)
* മഹാവാക്യത്തിലെ സമപ്രാധാന്യമുള്ള ഉപവാക്യങ്ങളെ വേര്‍തിരിച്ചെഴുതുമ്പോൾ.
* ഒരു ആശയത്തെ തുടര്‍ച്ചയായി പ്രതിപാദിക്കുന്ന വാക്യങ്ങൾക്കിടയില്‍.
ഉദാ:-
* സൂര്യന്‍ ഉദിച്ചു; വെളിച്ചം പരന്നു; പക്ഷികൾ പാടി; പ്രഭാതമായി.
* വരൾച്ച രൂക്ഷമായി; ജലസ്രോതസ്സുകൾ വറ്റിവരണ്ടു.
4. അപൂർണ വിരാമം (ഭിത്തിക) colon (:)
* തുല്യപ്രാധാന്യമുള്ള വാക്യങ്ങൾക്കിടയില്‍.
* ഉത്തരവാക്യം പൂർവവാക്യത്തിന്റെ വിശദീകരണമാകുമ്പോൾ.
* സംഭാഷണം സൂചിപ്പിക്കുന്നതിന്‌ മുമ്പ്‌.
ഉദാ:-
* ഇന്ത്യയിൽ മഹാത്മാഗാന്ധി : അമേരിക്കയിൽ എബ്രഹാം ലിങ്കൺ.
* ഇതിഹാസങ്ങൾ രണ്ടാണ് : രാമായണവും മഹാഭാരതവും.
* ശ്രീനാരായണഗുരു പറഞ്ഞു : 'മദ്യം വിഷമാണ്'.
5. അനുയോഗ ചിഹ്നം (ചോദ്യചിഹ്നം) (കാകു) Question Mark (?)
* ചോദ്യരൂപത്തിലുള്ള വാക്യത്തിന്റെ അവസാനം.
* സംശയമുള്ള വിഷയം പരാമര്‍ശിക്കുമ്പോൾ.
ഉദാ:-
* എവിടെയാണ്‌ താങ്കൾ താമസിക്കുന്നത്?
* മഹാകവി കാളിദാസന്‍ ബി.സി. ഒന്നാം ശതകത്തില്‍ (?) ജീവിച്ചിരുന്നു.
6. വിക്ഷേപിണി: (ആശ്ചര്യചിഹ്നം) ശില Exclamation mark (!)
* ആശ്ചര്യം, ആഹ്ലാദം, വിഷാദം, അധിക്ഷേപം മുതലായ ഭാവങ്ങളുള്ള പദങ്ങാൾക്കുശേഷം.
ഉദാ:-
1. അയ്യോ! എന്നെ കൊല്ലുന്നേ.
2. ഹായ്‌! മനോഹരമായ പുവ്‌.
3. കഷ്ടം! അങ്ങന്നെ സംഭവിച്ചല്ലോ.
4. ഛി! ഇറങ്ങ്‌ പുറത്ത്‌.
6. ഈശ്വരാ! രക്ഷിക്കണേ.
7. ഉദ്ധരണി (Quotation mark) ("")
* കവിവാക്യങ്ങൾ, സംഭാഷണങ്ങൾ എന്നിവ ഉദ്ധരിക്കുമ്പോൾ.
* ശൈലികൾ, പഴഞ്ഞൊല്ലുകൾ, ഗ്രന്ഥനാമങ്ങൾ, സാങ്കേതിക പദങ്ങൾ, പരഭാഷാപദങ്ങൾ എന്നിവ പ്രത്യേകം പരാമര്‍ശിക്കുമ്പോൾ (ഉദ്ധരണി ഒറ്റയായും ഇരട്ടയായും ഉപയോഗിക്കാം.)
ഉദാ:-
1) 'സ്നേഹമാണഖിലസാരമൂഴിയില്‍'
2) സ്വാമി വിവേകാനന്ദന്‍ പറഞ്ഞു: “ഉത്തിഷ്ഠത, ജാഗ്രത.”
3) ഇന്ത്യയിലെ 'പൂന്തോട്ട നഗരമാണ്‌ ബാംഗ്ലൂര്‍.
8. വലയം (Bracket) [()]
* ഒരു വാക്യത്തിനുള്ളില്‍ മറ്റൊരു വാക്യമോ വാചകമോ ഉൾപ്പെടുത്താന്‍.
* വാകൃത്തിനിടയില്‍ പ്രത്യേക വിശദീകരണങ്ങൾ ഉൾപ്പെടുത്താന്‍.
ഉദാ:-
1) വീണപൂവ്‌ ആണ്‌ (എനിക്ക്‌ ഏറ്റവും ഇഷ്ടപ്പെട്ട കൃതി) കുമാരനാശാന്റെ മികച്ച ഖണ്ഡകാവ്യം.
2 നീതിതേടി അയാൾ ഇന്ത്യയിലെ പരമോന്നത നീതിപീഠത്തെ (സുപ്രീംകോടതി) സമീപിച്ചു.
9. ശുംഖല (കുറുവര) Hyphen (-)
* പദ്യത്തില്‍ പദം മുറിച്ചെഴുതുമ്പോൾ.
* പദങ്ങളെ ബന്ധിപ്പിക്കുമ്പോൾ.
ഉദാ:-
1. 'ഗീതയ്ക്കു മാതാവായ ഭൂമിയെ ദൃഡാമിതു-
മാതിരിയൊരു കര്‍മയോഗിയെ പ്രസവിക്കൂ'
2. തിരുവനന്തപുരം-കണ്ണൂര്‍ തീവണ്ടിപ്പാത
3. കേശവീയം-കെ.സി. കേശവപിള്ള
10. രേഖ (നെടുവര) Dash (-)
* സംക്ഷേപിച്ചത്‌ വിവരിക്കുന്നതിനു മുമ്പ്‌
* വിവരിച്ചത്‌ സംക്ഷേപിക്കുന്നതിനു മുമ്പ്‌
* വിചാരഗതി മാറുന്നിടത്ത്‌
ഉദാ:-
1. സര്‍വവും നശിച്ചു-പണം, പ്രതാപം, ആരോഗ്യം.
2. ഭാര്യ, മക്കൾ, ബന്ധുക്കൾ-എല്ലാവരും എന്നെ വെറുത്തു.
3. ഞാൻ അത്രമേൽ സ്നേഹിച്ചിട്ടും-അല്ലെങ്കിൽ എന്തിന് ഇനിയും കഴിഞ്ഞ കാര്യങ്ങളോർക്കുന്നു.