എ കെ ഗോപാലൻ (എ കെ ജി)

 എ കെ ഗോപാലൻ (എ കെ ജി) (AK Gopalan)

ജനനം : 1904 ഒക്ടോബർ 1

മരണം : 1977 മാർച്ച് 22

പിതാവ് : രൈരു നമ്പ്യാർ

മാതാവ് : മാധവിഅമ്മ


എ.കെ.ജി എന്ന ചുരുക്കപ്പേരിലറിയപ്പെടുന്ന ആയില്യത്ത് കുറ്റ്യാരി ഗോപാലൻ നമ്പ്യാർ അഥവാ എ.കെ.ഗോപാലൻ കണ്ണൂരിലെ ചിറയ്ക്കൽ താലൂക്കിൽ ജനിച്ചു. ഇന്ത്യൻ തൊഴിലാളിവർഗ്ഗത്തിന്റെ അനിഷേധ്യനേതാവും പാർലമെന്റേറിയനുമായിരുന്നു ഇദ്ദേഹം. ഏഴുവർഷം അദ്ധ്യാപകനായി ജോലിനോക്കിയ എ.കെ.ജി 1927-ൽ ഇന്ത്യൻ നാഷണൽ കോൺഗ്രസ്സിന്റെ സജീവപ്രവർത്തകനായി. പിന്നീട് ജോലിരാജിവെച്ച് 1930ലെ ഉപ്പു സത്യാഗ്രഹത്തിൽ പങ്കെടുത്ത് നിയമലംഘനം നടത്തി അറസ്റ്റ് വരിച്ചു. പ്രസിദ്ധമായ ഗുരുവായൂർ സത്യാഗ്രഹത്തിലെ സജീവപങ്കാളിയായിരുന്നു ഇദ്ദേഹം. കോൺഗ്രസ് സോഷ്യലിസ്റ്റ് പാർട്ടിയിൽ പ്രവർത്തിച്ചിരുന്ന എ.കെ.ജി കമ്മ്യൂണിസ്റ്റ് പാർട്ടി രൂപവത്കരിക്കപ്പെട്ടപ്പോൾ അതിൽ അംഗമായി. മലബാറിൽ നിന്ന് മദിരാശിയിലേക്ക് ചരിത്രപ്രസിദ്ധമായ പട്ടിണിജാഥ നയിച്ചത് എ.കെ.ജി യാണ്. കമ്മ്യൂണിസ്റ്റ് പാർട്ടി പിളർന്നപ്പോൾ സി.പി.എമ്മിന്റെ സമുന്നതനേതാവായി. പോളിറ്റ് ബ്യൂറോ അംഗമായും പ്രവർത്തിച്ചു. പല ഘട്ടങ്ങളിലായി എ.കെ.ജി 16 വർഷം ജയിൽവാസം അനുഷ്ഠിച്ചു. 1942ൽ  വെല്ലൂരിൽവെച്ച് ജയിൽചാടിയ അദ്ദേഹത്തിന് 5 വർഷം ഒളിവിൽ കഴിയേണ്ടി വന്നു. 1952 മുതൽ 1977-ൽ മരിക്കുന്നതുവരെ എ.കെ.ജി പാർലമെന്റ് അംഗമായിരുന്നു. എ.കെ.ജി യുടെ ആത്മകഥയായ 'എന്റെ ജീവിതകഥ' വളരെ പ്രശസ്തമാണ്.


ഓർത്തിരിക്കേണ്ട വസ്തുതകൾ 


■ കേരളത്തിലെ കമ്മ്യൂണിസ്റ്റ് പാർട്ടി സംഘാടകരിൽ പ്രമുഖൻ. തൊഴിലാളികളുടെ പ്രിയ നേതാവ്. പ്രഗല്ഭനായ പാർലമെന്റേറിയൻ എന്നീ നിലകളിൽ കേരള ചരിത്രത്തിൽ തിളങ്ങിനിൽക്കുന്ന വിപ്ലവവ്യക്തിത്വം. 'പാവങ്ങളുടെ പടത്തലവൻ' എന്നു വിശേഷിപ്പിക്കപ്പെടുന്നു.


■ 1904 ഒക്ടോബറിൽ കണ്ണൂർ ജില്ലയിലെ മാവിലായിയിൽ ജനിച്ചു.


■ 1927-ൽ വിദേശവസ്ത്രബഹിഷ്കരണം. ഖാദി പ്രചാരണം എന്നിവയിൽ വ്യാപൃതനായി.


■ 1930-ൽ ഉപ്പു നിയമലംഘനം നടത്തിയതിന് അറസ്റ്റിലായി.


■ 1931-ൽ ഗുരുവായൂർ സത്യാഗ്രഹപ്രചാരണജാഥയുടെ ക്യാപ്റ്റൻ. ഗുരുവായൂർ സത്യാഗ്രഹ വളന്റിയർ ക്യാപ്റ്റനും എ.കെ.ജി.യായിരുന്നു.


■ കെ.പി.സി.സി.യുടെ സെക്രട്ടറിയായി 1934-ൽ തിരഞ്ഞെടുക്കപ്പെട്ടു.


■ 1934 മെയിൽ കോൺഗ്രസ് സോഷ്യലിസ്റ്റ് പാർട്ടി രൂപവത്കരിക്കപ്പെട്ടു.


■ 1936 ജൂലായിൽ എ.കെ.ജി.യുടെ നേതൃത്വത്തിൽ മദിരാശിയിലേക്ക് 'പട്ടിണിജാഥ' നയിച്ചു. കർഷകത്തൊഴിലാളി പ്രശ്നങ്ങൾ, തൊഴിലില്ലായ്മ, പട്ടിണി എന്നിവ ജനശ്രദ്ധയിൽ കൊണ്ടുവരാനും പരിഹാരമുണ്ടാക്കാൻ സർക്കാരിനെ പ്രേരിപ്പിക്കാനുമായിരുന്നു ഈ ജാഥ. 32 പേർ എ.കെ.ഗോപാലന്റെ നേതൃത്വത്തിൽ കണ്ണൂരിൽ നിന്ന് കാൽനടയായി ചെന്നൈയിലെത്തി.


■ 1938-ൽ തിരുവിതാംകൂറിലെ സ്വാതന്ത്ര്യസമരത്തെ സഹായിക്കാൻ അയച്ച മലബാർ ജാഥയുടെ ക്യാപ്റ്റൻ. ആലപ്പുഴയിലെ തൊഴിലാളി സമരത്തിലെ പ്രവർത്തനം.


■ 1944-ൽ കമ്മ്യൂണിസ്റ്റ് പാർട്ടി കേരള കമ്മിറ്റി സെക്രട്ടറി.


■ 1952-ൽ അഖിലേന്ത്യ കിസാൻ സഭയുടെ പ്രസിഡന്റായി തിരഞ്ഞെടുക്കപ്പെട്ടു. പാർലമെന്റ് മെമ്പറായി. ഒന്നാം ലോക്സഭയിൽ പ്രതിപക്ഷത്തെ നയിച്ചു. (പിൽക്കാലത്താണ് പ്രതിപക്ഷനേതാവ് പദം ലോക്സഭയിൽ വന്നത്).


■ 1956-ൽ ഗുജറാത്ത് പ്രക്ഷോഭത്തിൽ പങ്കെടുത്ത് അറസ്റ്റ് വരിച്ചു.


■ 1960-ൽ കാസർകോട്ടുനിന്ന് തിരുവനന്തപുരത്തേക്ക് കാൽനടജാഥ നയിച്ചു. കർഷക പ്രശ്നങ്ങൾ അടങ്ങുന്ന മെമ്മോറാണ്ടം ഗവൺമെന്റിന് സമർപ്പിച്ചു.


■ 1971-ലായിരുന്നു മിച്ചഭൂമി സമരം. മുടവൻമുഗൾ കൊട്ടാരത്തിലെ സമരത്തിന് അറസ്റ്റിലായി.


■ 1977 മാർച്ച് 22-നായിരുന്നു എ.കെ.ജി. അന്തരിച്ചത്.


■ 'എന്റെ ജീവിതകഥ'യാണ് എ.കെ.ജി.യുടെ ആത്മകഥ.


ആവർത്തിക്കുന്ന ചോദ്യങ്ങൾ


1. 1936-ലെ പട്ടിണി ജാഥക്ക് നേതൃത്വം കൊടുത്തത് ആരാണ് - എ.കെ.ഗോപാലൻ


2. പാർലമെന്റ് മന്ദിരത്തിൽ പ്രതിമ സ്ഥാപിക്കപ്പെട്ട ആദ്യ കമ്മ്യൂണിസ്റ്റ് നേതാവ് - എ.കെ.ഗോപാലൻ


3. ഉത്തരവാദപ്രക്ഷോഭണകാലത്ത് മലബാറിൽനിന്ന് ജാഥ നയിച്ചെത്തിയ എ.കെ.ഗോപാലൻ എവിടെ വച്ചാണ് അറസ്റ്റ് ചെയ്യപ്പെട്ടത് - ആലുവ


4. 1936-ൽ കണ്ണൂരിൽനിന്ന് മദ്രാസിലേക്ക് പട്ടിണിജാഥ നയിച്ചത് - എ.കെ.ഗോപാലൻ


5. എ.കെ.ഗോപാലന്റെ പട്ടിണിജാഥ പുറപ്പെട്ട സ്ഥലം - കണ്ണൂർ


6. എ.കെ.ഗോപാലൻ നയിച്ച പട്ടിണിജാഥയിൽ അദ്ദേഹത്തിന്റെ നേതൃത്വത്തിൽ എത്ര പേരാണ് കണ്ണൂരിൽനിന്ന് കാൽനടയായി ചെന്നൈയിലെത്തിയത് - 32


7. എ.കെ.ജി.യുടെ ആത്മകഥ - എന്റെ ജീവിതകഥ


8. ലോകസഭയിലെ ആദ്യത്തെ അനൗദ്യോഗിക പ്രതിപക്ഷ നേതാവ് - എ.കെ.ഗോപാലൻ


9. ഇന്ത്യൻ കോഫി ഹൗസ് സ്ഥാപിക്കാൻ മുൻകൈയെടുത്ത നേതാവ് - എ.കെ.ഗോപാലൻ


10. 'ഗുരുവായൂർ സത്യാഗ്രഹ'ത്തിന്റെ വോളന്റിയർ ക്യാപ്റ്റനായിരുന്നത് - എ.കെ.ഗോപാലൻ


11. ഷാജി എൻ കരുൺ സംവിധാനം ചെയ്ത അതിജീവനത്തിന്റെ കനൽവഴികൾ എന്ന സിനിമ ആരുടെ ജീവിതം പ്രമേയമാക്കിയുള്ളതാണ് - എ.കെ.ഗോപാലൻ

0 Comments